Rexeitamos novamente os polígonos industriais nos Montes do Morrazo

A Plataforma en Defensa dos Montes do Morrazo, cualifica como mediática e electoralista a escasos meses dos novos comicios autonómicos, a proposta da Consellaría de Medio Ambiente, Territorio e Infraestruturas (CMATI) a través do Instituto Galego da Vivenda e Solo (IGVS) de incluír finalmente o polígono empresarial Moaña-Marín e a plataforma loxística Marín-Pontevedra no Plan Sectorial de Ordenación de Áreas Empresariais de Galicia.

E tamén de irresponsable e incompetente ao intentar darlle cabida agora a proxectos que hai uns meses eran cualificados como inviables e coas peores puntuacións dentro do propio Plan sometido a exposición pública. Lembramos que entre esas baixas puntuacións estaba o elevado e irreversible impacto ambiental que provocaban eses proxectos ou a súa ilocalización como no caso do polígono empresarial Moaña-Marín.

As citadas áreas empresariais, que suman en total arredor dos 2 millóns de m2 de superficie, están proxectadas dentro do espazo natural dos Montes do Morrazo, nos lugares de Cruz da Maceira-Pastoriza no caso do polígono empresarial Moaña-Marín (1.500.000 m2 sumando as propostas dos PXOM de Moaña e Marín) e no monte Pornedo no caso da plataforma loxística Marín-Pontevedra (167.618 m2), cualificados como solo rústico de especial protección de espazos naturais.

Entre as afeccións ao solo rústico de especial protección do espazo natural están a paisaxística por enriba dos 400 metros de altitude entre as rías de Vigo e Pontevedra; a xeolóxica e edáfica incumprindo os desniveis permitidos, por enriba dun 25%, ante unha orografía moi abrupta e complicada; a hidrolóxica en nacementos de regos e regatos; a biolóxica en hábitats naturais de interese comunitario e en áreas naturais de poboacións animais e vexetais con endemismos ibéricos e especies vulnerables ou en vías de extinción; a cultural na área de protección de cuantiosos e cualificados xacementos arqueolóxicos e elementos patrimoniais (mámoas e petróglifos) inventariados ou mesmo catalogados como ben de interese cultural, monte comunal, explotacións forestais e gandeiras, sendeiros ecolóxicos catalogados e sinalizados de pequeno e longo percorrido a nivel municipal e comarcal; a territorial pola necesidade de novas vías asfaltadas de comunicación, …

A ese elevado impacto ambiental habería que lle engadir o conseguinte gasto económico, que en conxunto faría estes proxectos practicamente inviables, como finalmente vén demostrar a propia CMATI cando renuncia a executalos con fondos públicos, deixándoo a expensas de inversións do grande capital privado, o mesmo que insustentablemente nos meteu nesta crise global e financeira do sistema.

A mesma Xunta a través de Xestur no ano 2010 informou que estaban sen ocupar arredor de 1.500.000 m2 de superficie industrial en parques empresariais de nova construción a nivel provincial, sen que a situación probablemente mudara senón, todo o contrario, empeorara dada a forte e enquistada crise financeira e a tamén, por conseguinte, recesión no desenvolvemento empresarial e industrial.

Polo tanto, a Plataforma en Defensa dos Montes do Morrazo considera de auténtica tómbola a política que está levar a cabo esta Xunta de Galicia gobernada polo PP a través da CMATI, que da noite para a mañá o que dicía antes con argumentos técnicos deixa de dicilo agora con argumentos totalmente electoralistas e especulativos, demostrando unha falta de ordenación real do territorio, propio dun modelo de desenvolvemento que fluctua segundo os intereses políticos e empresariais de turno, sen lle importar a sustentabilidade das medidas a levar a cabo.

A Plataforma está en contra dos citados parques empresariais, e así llo fixo chegar oficialmente á Xunta o pasado mes de marzo nas alegacións feitas ao Plan Sectorial de Ordenación de Áreas Empresariais de Galicia, nas que solicitou que fronte ao criterio do 30% da demanda mínima para desenvolver un polígono se teña en consideración o deber de encher os polígonos existentes, xa que aínda non teñen todo o seu espazo ocupado, e que o resto da oferta de sólo empresarial e industrial, no caso de ser necesaria, se adapte á demanda real apostando por áreas municipais máis pequenas, cunha ocupación total de parcelas, fóra de espazos naturais e protexidos e cun menor impacto no medio.


Unha opinión sobre “Rexeitamos novamente os polígonos industriais nos Montes do Morrazo

Add yours

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Crea un sitio web ou un blogue de balde en WordPress.com.

Subir ↑

A %d blogueros les gusta esto: